قصيدة "الرقم بايخ لكن الصوت قتال"

قصيدة نبطية تستحق القراءة
رغم بساطتها وجرأة بعض مفرداتها
فأرجو المعذرة

البارحه جاني من الحب مرسال
من عقب ما بيني وبينه خصيمه

وأنا ترى في الحب مانب فعّال
ولا بعد ولّع بقلبي هشيمه

ولا بعد غنّيت فـي ساعة وصال
ولا بعد ذقت الفراق وجحيمه

ولا جرى دمعي على الخد همّال
ولا بعد جربت مرّ الهزيمه

حتى وردني تالي الليل جـوال
وانا على شاهي وبسكوت ديمـه

الرقم بايخ لكن الصوت قتال
كنه مثل صوت المذيعة حليمه

قالت مساء الخير يا طيّـب الفال
قلت رحبي ترحيبـةٍ مستديمه

بالعود والصفـري ودلة وفنجال
وأجيك يا بنت الأصول الكريمه

ردت بضحكة ثم قالت ويش الحال؟
قلت أشهد إن الحال عقبك سقيمه

قالت وهي تضحك بعد مثل الأطفال
وأنـا بعـد كني بدونك يتيمه

من يوم قالتها تزلزلت زلزال
من فجعتي كني مسوي جريمة

قلت : ارفعي صوتك ترى ما به إرسال
كذاب لكن المصيبة عظيمة

قالت أقول اسمع ترى هرجنا طال
ممكن تصاحبني تراني وسيمه؟

وإسمي الحقيقي أول حروفه الدال
لكـن يسمّوني البنات الزعيمه

صحيح أحب الفخفخة وأعشق المال
لكن تراني طاهـرة مستقيمة

ما عندي إمغازل ولا لعب يهّال
ما عندي إلا في الشرف والحشيمة

بس الصراحة قلبي لشوفتك مال
وأصبحت وحدك جالسٍ في صميمه

فكّر بعقلك وأترك القيل والقال
وأحذر تطيع أهل العقـول العقيمة

وأرسل علي الحين خمسميـة ريال
أشحن بها جوال أختي غنيمه

أو طقم غالي فيه خاتم وسلسال
أروح به في عـرس ولاّ عزيمة

قلت الحقيقة مانيب رجل أعمال
ولآني بتاجر والموارد عديمة

أنا الصراحة شبـه عطّال بطّال
وعلاقتي بالفقـر جداً حميمة

والراتب الله يرحم الحال مازال
محدود والمصروف ربي عليمه

والدين بالآلاف والبنـك شغّال
ياكل فلوسي بالربا والظليمة

والسوق طايح والغلا ضيّـق البال
والموت والله صاير أكبـر غنيمة

قالت تحمّل بـس والحمل ينشال
خلك شديد الباس صلب العزيمة

ياخي تصرّف جعلك تصيـر نشّال
أهـم شي إن النوايا سليمة

لابد تفهمني علـى كـل الأحوال
مادمت من أهل العقـول الفهيمة

قلت إيه والله فاهم اللي على البال
لكن ترى هـذي علينا قديمه

يا بنت هـذا صايـر اليوم موال
للي تبي تلعب على إبـن اللئيمه

يا بنت ما تدرين كم فيه محتال
يلعب على الحبلين وانتي غشيمة

يا بنت كم من جاهلة دمعها سال
من عقب ما جات العواقب وخيمة

والبنت لا أقفى عرضها بيد الأنذال
والله ما يبقى لها أي قيمه

قالت تبي ولاّ فخلّك على جال
مهوب ناقص نصايح حكيمة

عز الله إنك للأسف منـت رجّال
وإنك قليل الذوق ما فيك شيمة

يا لعنبو اللي ما يسطّرك بنعال
حتـى يعلمك الغزل يا بهيمه

تفووو عليك وصكّت الخط في الحال
مدري .. تفووو .. هي مدح ولاّ شتيمـه ؟

الرائع هو تواصلكم
وتسلم يمين من قال

مشكورة .. الله يكرمك