قصيدة بالعامية للشاعر أحمد فؤاد نجم

زائر

الشاعر المشكلة أحمد فؤاد نجم وقصيدته العامية طاطي طاطي
طاطي راسك طاطي طاطي .. انت ف وطن ديمقراطي
.. انت بتنعم بالحرية .. بس بشرط تكون مطاطي
لما تكون شغال بذمة .. خايف على مصلحة الأمة ..
شغلك يطلع من غير لازمة .. علشان مبيعلاش غير واطي
طاطي راسك طاطي طاطي .. انت ف وطن ديمقراطي
لما حاميها يكون حراميها .. وبلاده ورا ضهره راميها ..
طالع نازل واكل فيها .. مسنود بالبدلة الظباطي
طاطي راسك طاطي طاطي .. انت ف وطن ديمقراطي
لما شقاك يصبح مش ليك .. فقرك سد السكة عليك
تتلفّت تلقى حواليك .. إما حرامي و إما عقاطي
طاطي راسك طاطي طاطي .. انت ف وطن ديمقراطي
لما تلاقي بلاد الدنيا .. فيها البني آدم حاجة تانية ..
وانت في الطبقات الدنيا .. قرد مسلسل أو وطواطي
طاطي راسك طاطي طاطي .. انت ف وطن ديمقراطي
لما الجهلة يبقوا أمامك .. أو فوقك ماسكين ف زمامك ..
ويسوقك ع الهلكة إمامك .. تشرب م السم السقراطي
طاطي راسك طاطي طاطي .. انت ف وطن ديمقراطي
لما الكلمة تكون بتدينك .. لما تخبي ف قلبك دينك ..
لما الذل أشوفه ف عينك .. هات إحباطك على إحباطي
طاطي راسك طاطي طاطي انت ف وطن ديمقراطي ..
انت ف وطن ديمقراطي

زائر

من أقوى وأجرأ الشعراء المصريين الشعبيين قصيدة جميلة واسمح لي أضيف هنا قصيدة له أعجبتني يقول فيها استهزاء بأمر رئيس وزرائهم للشعب بعلاوة بسيطة لم يروها:

افندينا أنعم علينا بعلاوة / تجيب كيلو جبنة وعلبة حلاوة
آتاري العلاوة مجرد أتاوة / و احنا علينا الكلام اختلط
*****
عشان في البداية حسبناها خير / و قلنا نواية حتسند يا زير
و حسنة حتمنع بلاوي كتير / و كنا حقيقي في غاية العبط
*****
في لحظة افتكرنا ان لينا حقوق / ونمنا و صحينا لقينا الخازوق
و قبل اما حتى يا عالم نفوق / لقينا اللي لسه حناخده اتشفط
*****
أفندينا يعني في لحظة تجلي / تعطف تلطف و قرر يخللي
مساحة الغلابة تزيد ستة مللي / و ياكلو بدال التراب الزلط
*****
أفندينا أعلن صدور القرار / و قبل اما ينجح في أي اختبار
فوجئنا بزفة و مولد و زار / قصايد جرايد برامج يفط
*****
تؤكد بأن الحكومة بذكاء / و من حزمة واحدة قضت ع الغلاء
و لابد يبقى لدينا انتماء / و ناكل و نشرب و نلبس خطط
*****
عبال النمو اللي قالوا عليه / و حايشينه عنا منعرفش ليه
ماتلمح مكانا في مرة عينيه / و نقدر ندوق منه حتى نقط
*****
مادام كل حاجة تمام ع الورق / مفيش أي داعي عشان القلق
و لو مش مصدق خلاص اتفلق / ورقنا اللي صح وكلامك غلط
*****
و قاللي مواطن عليم بالخبايا / أفندينا قرر تزيد الجباية
عشان شعبه جاحد قليل الرباية / بياكل و ينكر زي القطط

*****
اذا الشعب صدى بفعل البارومة / حتعمل حسابه ف ايه الحكومة
وهي اللي جاهزة بكرباج وشومة / عشان لوفي واحد في عقله اتخبط
*****
تعيش مصر دايما في عز و جمال / يعيش المواطن شديد الاحتمال
و آمن تماما من الاشتعال / و أقصى ما عنده ينكت فقط

بارك الله فيكم
مواضيع شيقه
ابداع في الاختيار

زائر

أختي تهاني
شكرا لمرورك وشكرا لإضافتك الجميلة

أختي المتفائلة
شكرا لك على الإطراء

» قصيدة التأشيرة للشاعر هشام
» قصيدة اوباما
» قصيدة رائعة